ಐ.ಐ.ಎಸ್ ಸಿ.ಯಲ್ಲಿ ವೈರಲ್ ಬಿಎಸ್ಎಲ್-3 ಘಟಕ ಮತ್ತು DBT-BIRAC ಕೋವಿಡ್-19 ಲಸಿಕೆ ಪರೀಕ್ಷಾ ಕೇಂದ್ರ


ಜೈವಿಕ ತಂತ್ರಜ್ಞಾನ ಇಲಾಖೆಯಡಿಯ ಜೈವಿಕ ತಂತ್ರಜ್ಞಾನ ಉದ್ಯಮ ಸಂಶೋಧನಾ ನೆರವು ಮಂಡಳಿಯು (DBT-BIRAC)  ಭಾರತೀಯ ವಿಜ್ಞಾನ ಸಂಸ್ಥೆಯ (ಐ.ಐ.ಎಸ್.ಸಿ.) ಸಾಂಕ್ರಾಮಿಕ ರೋಗಗಳ ಸಂಶೋಧನಾ ಕೇಂದ್ರದಲ್ಲಿರುವ (ಸಿ.ಇ.ಡಿ.ಆರ್.) ವೈರಲ್ ಬಯೋ ಸೇಫ್ಟಿ ಲೆವೆಲ್-3 (ಬಿ.ಎಸ್.ಎಲ್.-3) ಘಟಕದಲ್ಲಿ ಕೋವಿಡ್-19 ಲಸಿಕೆ ಪರೀಕ್ಷಾ ಕೇಂದ್ರದ ಸ್ಥಾಪನೆಗೆ ಅನುದಾನ ನೀಡಿದೆ,

ಶೈಕ್ಷಣಿಕ ಸಂಸ್ಥೆಗಳಿಂದ ಹಾಗೂ ಉದ್ಯಮ ಪಾಲುದಾರರಿಂದ ಬರುವ ಕೋವಿಡ್-19ಗೆ ಸಂಬಂಧಿಸಿದ ಲಸಿಕೆಗಳು, ಆಂಟಿವೈರಲ್ ಗಳು, ಪರಿಕರಗಳು ಮತ್ತು ಉಪಕರಣಗಳನ್ನು ಇಲ್ಲಿ ಉಚಿತವಾಗಿ ಪರೀಕ್ಷಿಸಲಾಗುತ್ತದೆ.

ಸಂಸ್ಥೆಯ ಜೈವಿಕ ವಿಜ್ಞಾನಗಳ ವಿಭಾಗವು ಕೋವಿಡ್-19 ಸೋಂಕು ವರದಿಯಾಗುವ ಮುನ್ನವೇ ಸೂಕ್ಷ್ಮಾಣು ಜೀವಿಶಾಸ್ತ್ರ ಮತ್ತು ಕೋಶ ಜೀವಶಾಸ್ತ್ರ (ಎಂ.ಸಿ.ಬಿ.) ವಿಭಾಗದ ಪ್ರಾಧ್ಯಾಪಕ ಉಮೇಶ್ ವರ್ಷ್ಣಿ ಅವರ ನೇತೃತ್ವದಲ್ಲಿ ಸಿ.ಐ.ಡಿ.ಆರ್.ನಲ್ಲಿ ನಿಯೋಜಿತ ವೈರಲ್ ಬಿಎಸ್ಎಲ್-3 ಘಟಕಕ್ಕೆ ಚಾಲನೆ ನೀಡಿತ್ತು. ತೀವ್ರ ರೋಗಕಾರಕ ಮಾನವ ವೈರಾಣುಗಳ ಕುರಿತ ಸಂಶೋಧನೆಗೆ ನೆರವು ನೀಡುವುದು ಈ ಜೈವಿಕ ತಂತ್ರಜ್ಞಾನ ಇಲಾಖೆ ಹಾಗೂ ಐ.ಐ.ಎಸ್.ಸಿ. ಅನುದಾನಿತ ಘಟಕದ ಉದ್ದೇಶವಾಗಿದೆ. ಈ ಘಟಕದ ನಿರ್ಮಾಣ ಕಾರ್ಯ 2020ರ ಅಕ್ಟೋಬರ್ ನಲ್ಲಿ ಪೂರ್ಣಗೊಂಡಿತು. ನಂತರ, ಜೈವಿಕ ವಿಜ್ಞಾನಗಳ ನಿಕಾಯದ ಡೀನ್ ಉಷಾ ವಿಜಯರಾಘವನ್ ಅವರ ಮಾರ್ಗದರ್ಶನದಲ್ಲಿ ಎಲ್ಲಾ ಅಗತ್ಯ ಪ್ರಮಾಣೀಕೃತ ಕಾರ್ಯಾಚರಣಾ ವಿಧಾನಗಳೊಂದಿಗೆ (ಎಸ್.ಒ.ಪಿ.) 2021ರ ಜನವರಿಯಲ್ಲಿ ಇದು ಕಾರ್ಯಾರಂಭಗೊಂಡಿತು. ಸೂಕ್ಷ್ಮಾಣು ಜೀವಿಶಾಸ್ತ್ರ ಮತ್ತು ಕೋಶ ಜೀವಶಾಸ್ತ್ರ (ಎಂ.ಸಿ.ಬಿ.) ವಿಭಾಗದ ಸಹಾಯಕ ಪ್ರಾಧ್ಯಾಪಕ ಶಶಾಂಕ್ ತ್ರಿಪಾಠಿ ಅವರು ಈ ಘಟಕದ ಸಮನ್ವಯಾಧಿಕಾರಿಯಾಗಿ ನಿಯೋಜನೆಗೊಂಡರು. ಐ.ಐ.ಎಸ್.ಸಿ.ಗೆ ಸೇರಿದ ಮತ್ತು ಹೊರಗಿನ ಶೈಕ್ಷಣಿಕ ಪ್ರಯೋಗಾಲಯಗಳ ಹಾಗೂ ಉದ್ಯಮಗಳ ಸಿಬ್ಬಂದಿ ತರಬೇತಿಗೆ ಮತ್ತು ವೈರಾಣು ನಿರೋಧಕ (ಆಂಟಿವೈರಲ್) ಸಂಶೋಧನೆಗಳ ಬಳಕೆಗೆ ಇದನ್ನು ಲಭ್ಯವಾಗಿಸಲಾಯಿತು.

ಹೊಸದಾಗಿ ಕಂಡುಬರುವ ವೈರಾಣು ರೋಗಕಾರಕಗಳ ಬಗ್ಗೆ ಅಧ್ಯಯನ ನಡೆಸುವ ತ್ರಿಪಾಠಿ ಅವರ ಪ್ರಯೋಗಾಲಯವು 2021ರ ಫೆಬ್ರುವರಿಯಲ್ಲಿ ಈ ವೈರಲ್ ಬಿಎಸ್ಎಲ್-3 ಘಟಕದಲ್ಲಿ SARS-CoV-2 ಅಧ್ಯಯನಕ್ಕಾಗಿ ಕೋಶ ಸಂಸ್ಕರಣೆ ಮತ್ತು ಪ್ರಾಣಿ ಮಾದರಿಗಳನ್ನು ಸ್ಥಾಪಿಸುವ ಕಾರ್ಯ ಆರಂಭಿಸಿತು. ಕೋವಿಡ್-19 ಬಾಧಿತರ ಮಾದರಿಗಳಿಂದ SARS-CoV-2 ವೈರಾಣುಗಳ ಪ್ರತ್ಯೇಕತೆ, ಬೆಳವಣಿಗೆ, ಗುಣಸ್ವರೂಪಗಳ ನಿಗದಿಯ ಜೊತೆಗೆ ಕೋವಿಡ್-19 ಲಸಿಕೆಗಳು ಹಾಗೂ ಆಂಟಿವೈರಲ್ ಗಳ ಮೌಲ್ಯಮಾಪನಕ್ಕೆ ಸಿರಿಯನ್ ಹ್ಯಾಮ್ ಸ್ಟರ್ ನಮೂನೆ ಸ್ಥಾಪನೆಯನ್ನು ಇದು ಒಳಗೊಂಡಿದೆ.


—————-

ಸಂಸ್ಥೆಯ ಆಣ್ವಿಕ ಜೈವಿಕ-ಭೌತಶಾಸ್ತ್ರ ವಿಭಾಗದ ಪ್ರಾಧ್ಯಾಪಕ ರಾಘವನ್ ವರದರಾಜನ್ ಅವರ ನೇತೃತ್ವದ ತಂಡವು ಐ.ಐ.ಎಸ್.ಸಿ. ಪರಿಪೋಷಕತ್ವದ ನವೋದ್ಯಮವಾದ ಮಿನ್ ವ್ಯಾಕ್ಸ್ ಸಹಭಾಗಿತ್ವದಲ್ಲಿ ಅಭಿವೃದ್ಧಿಪಡಿಸುತ್ತಿರುವ SARS-CoV-2  ಆಂಟಿವೈರಲ್ ಗಳನ್ನು ಗುರುತಿಸಲು ಮತ್ತು ಕೋವಿಡ್-19 ಉಷ್ಣ ತಾಳಿಕೆ ಲಸಿಕೆಯನ್ನು ಮೌಲ್ಯಮಾಪನ ಮಾಡಲು ಈ ರೀಏಜೆಂಟ್ ಗಳು ಮತ್ತು ನಮೂನೆಗಳನ್ನು ಬಳಸಲಾಯಿತು. ಅಲ್ಲದೇ, ಕೋವಿಡ್-19 ಪ್ರತಿಕಾಯಗಳ ಮೌಲ್ಯಮಾಪನದಲ್ಲಿ GeNext Genomics ಗೆ, ಕ್ರಿಮಿಮುಕ್ತ (ಸ್ಟೆರಿಲೈಸೇಷನ್) ತಾಂತ್ರಿಕತೆಗಳನ್ನು ಪರೀಕ್ಷಿಸಲು Biomoneta ಗೆ ಹಾಗೂ ಕೋವಿಡ್-19 ಪೆಪ್ಟೈಡ್ ಯುಗ್ಮ ಲಸಿಕೆಯನ್ನು ಪ್ರಾಣಿಗಳ ಮೇಲೆ ಮೌಲ್ಯಮಾಪನ ಮಾಡಲು Glycovax ಗೆ ಈ ಪ್ರಯೋಗಲಾಯವು ನೆರವು ನೀಡುತ್ತಿದೆ.

ತ್ರಿಪಾಠಿ ಮತ್ತು ಸಿಐಡಿಆರ್ ಸಂಚಾಲಕರಾದ ಎಂ.ಸಿ.ಬಿ. ಪ್ರಾಧ್ಯಾಪಕ ಕೆ.ಎನ್.ಬಾಲಾಜಿ ಅವರು ಈ ಕಾರ್ಯಾಚರಣೆಗಳನ್ನು ವಿಸ್ತರಿಸುವ ಉದ್ದೇಶಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. ನಂತರ, SARS-CoV-2 ಅಧ್ಯಯನಕ್ಕಾಗಿ ಸುಸಜ್ಜಿತ ಮಾದರಿಗಳನ್ನೊಳಗೊಂಡ ಪ್ರಯೋಗಾಲಯಗಳಿಗೆ ನೆರವು ನೀಡುವ ಉದ್ದೇಶ ಹೊಂದಿರುವ DBT-BIRAC ಉಪಕ್ರಮದ ಕೋವಿಡ್ ಸುರಕ್ಷಾ ಕಾರ್ಯಕ್ರಮದಡಿ ಈ ಘಟಕವು ಅನುದಾನವನ್ನು ಪಡೆದಿತ್ತು.


—————-

DBT-BIRAC ಅನುದಾನದ ನೆರವಿನಿಂದಾಗಿ ಘಟಕದಲ್ಲಿ ಅತ್ಯಾಧುನಿಕ ಉಪಕರಣಗಳನ್ನು ಅಳವಡಿಸಲು ಹಾಗೂ ಘಟಕದ ಕಾರ್ಯಾಚರಣಾ ಸಿಬ್ಬಂದಿಗೆ ಆರಂಭಿಕ ಹಂತದ ನೆರವು ನೀಡಲು ಸಾಧ್ಯವಾಗಲಿದೆ. ಜೊತೆಗೆ, SARS-CoV-2.ಆಂಟಿವೈರಲ್ ಗಳ ಮೌಲ್ಯಮಾಪನಕ್ಕೆ ಮತ್ತು ಲಸಿಕೆಗಳಿಗೆ ಅಧಿಕ ಉತ್ಪಾದಕ ವಿಧಾನಗಳನ್ನು ಅಭಿವೃದ್ಧಿಪಡಿಸಲು ಸಂಶೋಧನೆ ನಡೆಸಲಾಗುತ್ತದೆ.

ಉರಿಶೀತ (ಇನ್ ಫ್ಲುಯೆನ್ಸಾ), ಡೆಂಗಿ, ಚಿಕೂನ್ ಗುನ್ಯಾ ಮತ್ತು ಎಚ್ಐವಿ ಗಳಿಗೆ ಕಾರಣವಾಗುವ ಇತರ ವೈರಾಣು ರೋಗಕಾರಕಗಳಿಗೆ ಆಂಟಿವೈರಲ್ ಗಳು ಹಾಗೂ ಲಸಿಕೆಗಳನ್ನು ಅಭಿವೃದ್ಧಿಪಡಿಸುವುದಕ್ಕೂ ಈ ಘಟಕವು ಸಹಕರಿಸಲಿದೆ. ಪಾಲುದಾರ ಶೈಕ್ಷಣಿಕ ಸಂಸ್ಥೆಗಳು ಹಾಗೂ ಉದ್ದಿಮೆಗಳಿಗೆ ಇದು ಉಚಿತವಾಗಿ ಲಭ್ಯವಾಗಲಿದೆ.

ಸಂಪರ್ಕಿಸಿ:
ಶಶಾಂಕ್ ತ್ರಿಪಾಠಿ
ಸಹಾಯಕ ಪ್ರಾಧ್ಯಾಪಕರು, ವೆಲ್ ಕಮ್ ಟ್ರಸ್ಟ್ ಇಂಡಿಯಾ ಅಲಯನ್ಸ್ ಇಂಟರ್ ಮೀಡಿಯೇಟ್ ಫೆಲೊ
ಸೂಕ್ಷ್ಮಾಣು ಜೀವಿಶಾಸ್ತ್ರ ಮತ್ತು ಕೋಶ ಜೀವಶಾಸ್ತ್ರ ವಿಭಾಗ
ಸಾಂಕ್ರಾಮಿಕ ರೋಗಗಳ ಸಂಶೋಧನಾ ಕೇಂದ್ರ (ಸಿ.ಐ.ಡಿ.ಆರ್.)
ಭಾರತೀಯ ವಿಜ್ಞಾನ ಸಂಸ್ಥೆ (ಐ.ಐ.ಎಸ್ ಸಿ.)
ಇ-ಮೇಲ್: shashankt@iisc.ac.in
ಫೋನ್: +91-80-22932884

—-000—–