ಕೀಮೋಥೆರಪಿ ಪ್ರೇರಿತ ನೋವಿನ ಪ್ರತಿವರ್ತನೆಯನ್ನು ಮಿದುಳಿನ ನಿರ್ದಿಷ್ಟ ವಲಯಗಳು ನಿರ್ದೇಶಿಸುವುದಾದರೂ ಹೇಗೆ?

08 ಜನವರಿ 2025

-ರೋಹಿಣಿ ಸುಬ್ರಹ್ಮಣ್ಯಂ

ಒಂದೆಡೆ, ದೀರ್ಘಕಾಲೀನ ಶಾರೀರಿಕ ನೋವು ವ್ಯಕ್ತಿಯನ್ನು ನಿತ್ರಾಣಗೊಳಿಸಬಲ್ಲದು. ಮತ್ತೊಂದೆಡೆ, ಆಂತರಿಕ ಒತ್ತಡ, ಭೀತಿ ಹಾಗೂ ಹಸಿವಿನ ಅನುಭವಗಳು ಕೆಲವೊಮ್ಮೆ ನೋವಿನ ಸಂವೇದನೆಗಳನ್ನು ಕೂಡ ಹತ್ತಿಕ್ಕಬಲ್ಲದು. ಪ್ರಾಣಿಗಳಲ್ಲಿ ನೋವಿನ ಪ್ರತಿಕ್ರಿಯೆಯನ್ನು ಜಾಗ್ರತೆವಹಿಸಿ ಪ್ರಕಟಗೊಳಿಸುವಲ್ಲಿ ಮಿದುಳಿನ ವಿವಿಧ ವಲಯಗಳಲ್ಲಿನ ವೈವಿಧ್ಯಮಯ ನರಕೋಶಗಳು ಪಾತ್ರ ವಹಿಸುತ್ತವೆ. ಇದೀಗ, ಭಾರತೀಯ ವಿಜ್ಞಾನ ಸಂಸ್ಥೆಯ (ಐ.ಐ.ಎಸ್.ಸಿ) ನರವಿಜ್ಞಾನ ಕೇಂದ್ರದ (ಸಿ.ಎನ್.ಎಸ್) ವಿಜ್ಞಾನಿಗಳು ದೀರ್ಘಕಾಲೀನ ನೋವನ್ನು ನಿಯಂತ್ರಿಸುವಲ್ಲಿ ಈ ಮಿದುಳಿನ ನರಕೋಶಗಳು (ನ್ಯೂರಾನ್ ಗಳು) ಹೇಗೆ ಕಾರ್ಯಾಚರಿಸುತ್ತವೆ ಎಂಬುದನ್ನು ಇಲಿಗಳ ಮೇಲೆ ಅಧ್ಯಯನ ನಡೆಸಿ ಅರ್ಥೈಸಿಕೊಂಡಿದ್ದಾರೆ. ಇದರಿಂದ, ಮಿದುಳಿನ ನರಕೋಶಗಳು ನೋವನ್ನು ನಿರ್ವಹಿಸಲು ಅಥವಾ ಹತ್ತಿಕ್ಕಲು ಹೇಗೆ ಕಾರಣವಾಗುತ್ತವೆ ಎಂಬುದು ಕೂಡ ಅನಾವರಣಗೊಂಡಿದೆ. ಇಂತಹ ಒಳನೋಟಗಳು ದೀರ್ಘಕಾಲೀನ ನೋವು ನಿರ್ವಹಣೆಗೆ ಚಿಕಿತ್ಸಕ ಪರಿಹಾರಗಳನ್ನು ಕಂಡುಹಿಡಿಯಲು ಸಂಶೋಧಕರಿಗೆ ನೆರವಾಗಬಲ್ಲವು.

ಸಿ.ಎನ್.ಎಸ್.ದಲ್ಲಿ ಸಹಾಯಕ ಪ್ರಾಧ್ಯಾಪಕರಾಗಿರುವ ಅರ್ಣಬ್ ಬಾರಿಕ್ ಹಾಗೂ ಅವರ ತಂಡದವರು ಇದಕ್ಕಾಗಿ ಕೀಮೋಥೆರಪಿ ಪ್ರೇರಿತ ಪೆರಿಫೆರಲ್ ನ್ಯೂರೋಪಥಿ (ಸಿಐಪಿಎನ್) ಬಾಧಿತ ಇಲಿಗಳನ್ನು ಅಧ್ಯಯನಕ್ಕೆ ಒಳಪಡಿಸಿದ್ದರು. ಅಂದಂತೆ, ಈ ಸಿಐಪಿಎನ್ ಕೀಮೋಥೆರಪಿಯ ಸಾಮಾನ್ಯವಾದ, ಆದರೆ ಇನ್ನೂ ಅಷ್ಟಾಗಿ ಅರ್ಥವಾಗಿರದ ಅಡ್ಡಪರಿಣಾಮವಾಗಿದೆ. ಇದು, ಕ್ಯಾನ್ಸರ್ ಬಾಧಿತರನ್ನು ಶೀತಲ ತಾಪಮಾನದಂತಹ ಬಾಹ್ಯ ಪ್ರಚೋದನೆಗಳಿಗೆ ಅತಿಸಂವೇದನೆಯೊಂದಿಗೆ ಪ್ರತಿವರ್ತಿಸಲು ಎಡೆಮಾಡಿಕೊಡುತ್ತದೆ. ಹೀಗಾಗುವುದರಲ್ಲಿ ಲ್ಯಾಟೆರಲ್ ಪ್ಯಾರಾಬ್ರ್ಯಾಕಿಯಲ್ ನ್ಯೂಕ್ಲಿಯಸ್ (ಎಲ್.ಪಿ.ಬಿ.ಎನ್) ಎಂಬ ಮಿದುಳಿನ ವಲಯವು ಪ್ರಧಾನ ಪಾತ್ರ ವಹಿಸುತ್ತದೆ ಎಂಬುದನ್ನು ತಜ್ಞರು ಹೊಸ ಅಧ್ಯಯನದಲ್ಲಿ ದೃಢಪಡಿಸಿಕೊಂಡಿದ್ದಾರೆ.

ಎಲ್.ಪಿ.ಬಿ.ಎನ್. ಮಿದುಳಿನ ನರಕೋಶಗಳನ್ನು ಸಕ್ರಿಯಗೊಳಿಸಿದಾಗ ಇಲಿಗಳು ತಮ್ಮ ಕಾಲಿನ ಪಂಜಗಳನ್ನು ಹೆಚ್ಚು ಬಾರಿ ಪದೇಪದೇ ನೆಕ್ಕಿಕೊಳ್ಳಲು ಶುರು ಮಾಡಿದವು. ಇದು ನೋವಿನಿಂದ ಕೂಡಿದ ಶೀತಲ ಪ್ರಚೋದನೆಗೆ ಪ್ರತಿಕ್ರಿಯೆಯಾಗಿದ್ದು, ಅದನ್ನು ಸಕ್ರಿಯವಾಗಿ ನಿರ್ವಹಿಸುವ ಮಾರ್ಗೋಪಾಯವಾಗಿದೆ. ಈ ಎಲ್.ಪಿ.ಬಿ.ಎನ್. ಮಿದುಳಿನ ನರಕೋಶಗಳು ಒಂದು ಬಗೆಯಲ್ಲಿ “ರಿಲೇ ಜಂಕ್ಷನ್” ಗಳಂತೆ ವರ್ತಿಸುತ್ತವೆ. ಅಂದರೆ, ಮಿದುಳಿನ ವಿವಿಧ ವಲಯಗಳಿಂದ ಸ್ವೀಕರಿಸುವ ಒಳಪೂರಣಗಳ (ಇನ್ ಪುಟ್ ಗಳ) ವಿಧ ಹಾಗೂ ಚಟುವಟಿಕೆಯನ್ನು ಆಧರಿಸಿ ಇವು ಇಲಿಗಳಿಗೆ ಯಾವ ಪ್ರಮಾಣದಲ್ಲಿ ನೋವಿನ ಅನುಭವವಾಗುತ್ತದೆ ಹಾಗೂ ಅವು ಅದನ್ನು ಹೇಗೆ ನಿರ್ವಹಿಸುತ್ತವೆ ಎಂಬುದನ್ನು ನಿಯಂತ್ರಿಸುತ್ತವೆ.

ಕೆಲವು ಪ್ರಚೋದನೆಗಳಿಂದ ಸಾಮಾನ್ಯವಾಗಿ ಆರೋಗ್ಯಕರ ವ್ಯಕ್ತಿಗಳ ಅನುಭವಕ್ಕೆ ಬಾರದಂತಹ ನೋವು ಕೆಲವು ಸಂಧಿವಾತ ಅಥವಾ ಸಿಐಪಿಎನ್ ಬಾಧಿತರರಿಗೆ ಅಧಿಕ ಪ್ರಮಾಣದಲ್ಲಿ ಅನುಭವಕ್ಕೆ ಬರುತ್ತದೆ. ಸಿಐಪಿಎನ್ ಇಲಿಗಳಲ್ಲಿ ಇದೇ ತರಹದ ಲಕ್ಷಣಗಳು ಕಂಡುಬಂದವು ಎಂದು ಬಾರಿಕ್ ಅವರ ಪ್ರಯೋಗಾಲಯದ ಹಳೆಯ ವಿದ್ಯಾರ್ಥಿ ಹಾಗೂ ಅಧ್ಯಯನ ವರದಿಯ ಮೊದಲ ಲೇಖಕರಾದ ಪ್ರಣಯ್ ರೆಡ್ಡಿ ಅವರು ವಿವರಿಸುತ್ತಾರೆ. ಮುಂದುವರಿದು, “ಯಾವ ಸನ್ನಿವೇಶದಲ್ಲಿ ನಮಗೆ ನೋವಿನ ಅನುಭವ ಆಗಬಾರದೋ ಅಂತಹ ಸಂದರ್ಭದಲ್ಲಿ ನೋವಿನ ಅನುಭವವಾಗಬೇಕೆಂದರೆ ಮಿದುಳಿನಲ್ಲೇ ಏನೋ ವ್ಯತ್ಯಯ ಉಂಟಾಗಬೇಕು. ಮಿದುಳಿನ ಕೆಲವು ವಲಯಗಳಲ್ಲಿ ಅಧಿಕ ಪ್ರಮಾಣದಲ್ಲಿ ನರಕೋಶಗಳ ಉದ್ವಿಗ್ನತೆ (ನ್ಯೂರಾನ್ ಫೈರಿಂಗ್) ಅಥವಾ ನಿರುದ್ವಿಗ್ನತೆ (ನ್ಯೂರಾನ್ ಮಿಸ್ ಫೈರಿಂಗ್) ಆಗಬೇಕು” ಎಂಬುದು ಅವರ ಪ್ರತಿಪಾದನೆ.

ಎಲ್.ಪಿ.ಬಿ.ಎನ್.ದಲ್ಲಿನ ಈ ಅಧಿಕ ಉದ್ವಿಗ್ನತೆಗೆ (ಫೈರಿಂಗ್) ಬೆನ್ನುಹುರಿಯ ಉದ್ದೀಪಕ ನರಕೋಶೀಯ ಒಳಪೂರಣಗಳು ಕೊಂಚಮಟ್ಟಿಗೆ ಕಾರಣವಿರಬಹುದು. ಏಕೆಂದರೆ, ಈ ಒಳಪೂರಣಗಳನ್ನು ಸಕ್ರಿಯಗೊಳಿಸಿದಾಗ ಇಲ್ಲಿಗಳಲ್ಲಿ ನೆಕ್ಕಿಕೊಳ್ಳುವಿಕೆಯು ಹೆಚ್ಚಾಗಿದ್ದುದು ತಂಡದ ತಜ್ಞರಿಗೆ ದೃಢಪಟ್ಟಿತು.

ಅಂದಂತೆ, ಮಿದುಳಿನ ಲ್ಯಾಟರಲ್ ಹೈಪೊಥ್ಯಾಲಮಸ್ ವಲಯವು ಪ್ರಧಾನವಾಗಿ ಆಂತರಿಕ ಒತ್ತಡ ಹಾಗೂ ಹಸಿವಿನಂತಹ ಅನುಭವಗಳನ್ನು ನಿಯಂತ್ರಿಸುವಲ್ಲಿ ಭಾಗಿಯಾಗುವ ವಲಯವಾಗಿದೆ. ಈ ಲ್ಯಾಟರಲ್ ಹೈಪೊಥ್ಯಾಲಮಸ್ ನಿಂದ ಹೊರಹೊಮ್ಮಿದ ನಿರುದ್ದೀಪಕ ಒಳಪೂರಣಗಳನ್ನು (ಇನ್ ಹಿಬಿಟರಿ ಇನ್ ಪುಟ್) ಸಕ್ರಿಯಗೊಳಿಸಿದಾಗ ಶೀತಲ-ಪ್ರೇರಿತ ನೆಕ್ಕುವ ಪ್ರತಿಕ್ರಿಯೆ ಕಡಿಮೆಗೊಂಡಿತು. ಬಹುಶಃ, ಇದು ನೋವಿನ ಸಂವೇದನೆಗಳನ್ನು ಕೂಡ ಕಡಿಮೆ ಮಾಡುತ್ತದೆ ಎಂಬುದು ತಜ್ಞರ ಊಹೆಯಾಗಿದೆ.

ಈ ಎರಡೂ ವಿಧದ ಒಳಪೂರಣಗಳು ಒಂದೇ ಬಗೆಯ ಎಲ್.ಪಿ.ಬಿ.ಎನ್. ನರಕೋಶಗಳಲ್ಲಿ ಏಕತ್ರಗೊಳ್ಳುತ್ತವೆ ಎಂಬುದನ್ನು ಸಂಶೋಧಕರು ದೃಢಪಡಿಸಿಕೊಂಡಿದ್ದಾರೆ. ಈ ನರಕೋಶಗಳು ತಾವು ಸ್ವೀಕರಿಸುವ ಒಣಪೂರಣದ ತೀವ್ರತೆ ಆಧರಿಸಿ ನೆಕ್ಕುವಿಕೆ ಕಡಿಮೆಗೊಳಿಸಬೇಕೋ (ನೋವು ಕಡಿಮೆ ಇರುವಾಗ) ಅಥವಾ ನೆಕ್ಕುವಿಕೆ ಜಾಸ್ತಿ ಮಾಡಬೇಕೋ (ನೋವು ಜಾಸ್ತಿ ಇದ್ದಾಗ) ಎಂಬುದನ್ನು ನಿರ್ಧರಿಸುತ್ತವೆ.

“ಉದಾಹರಣೆಗೆ ಹೇಳುವುದಾದರೆ, ವ್ಯಕ್ತಿಯೊಬ್ಬ ತೀವ್ರವಾಗಿ ಹಸಿದಿದ್ದು ಜೊತೆಗೆ ಬೆನ್ನುನೋವು ಕೂಡ ಇದ್ದರೆ, ಆ ವ್ಯಕ್ತಿಯು ಬೆನ್ನುನೋವನ್ನು ಹೇಗೋ ತಾಳಿಕೊಂಡು ಮೊದಲಿಗೆ ಆಹಾರ ಪಡೆಯಲು ಪ್ರಯತ್ನಿಸುತ್ತಾನೆ” ಎನ್ನುತ್ತಾರೆ ಬಾರಿಕ್. “ಒಂದೊಮ್ಮೆ, ಎಲ್ಲಾ ನರಕೋಶಗಳು ತೀವ್ರವಾಗಿ ಪ್ರಚೋದಿತಗೊಂಡು ತೀವ್ರ ನೋವಿದ್ದಾಗ ವ್ಯಕ್ತಿಯು ಆಹಾರ ಸೇವನೆ ಬಗ್ಗೆ ಗಮನ ನೀಡುವ ಗೋಜಿಗೆ ಹೋಗುವುದಿಲ್ಲ. ಮಿದುಳು ಇದನ್ನು ಅಚ್ಚುಕಟ್ಟಾಗಿ ಲೆಕ್ಕಾಚಾರ ಹಾಕುತ್ತದೆ. ಇಂತಹ ಪ್ರಕರಣಗಳಲ್ಲಿ ಯಾವುದು ಅತ್ಯುತ್ತಮ ನಿರ್ಧಾರ ಎಂಬುದನ್ನು ನಿರ್ಧರಿಸಲು ನೆರವಾಗುವ ಮಿದುಳಿನ ಅಂತರ್ಗತ ವಿಧಾನಗಳು ಎಲ್.ಪಿ.ಬಿ.ಎನ್., ಬೆನ್ನುಹುರಿ ಹಾಗೂ ಹೈಪೊಥ್ಯಾಲಮಸ್ ನಂತಹ ವಲಯಗಳನ್ನು ಒಳಗೊಳ್ಳುತ್ತದೆ” ಎಂಬುದು ಬಾರಿಕ್ ಅವರ ವಿವರಣೆಯಾಗಿದೆ.

ಸಂಧಿವಾತ ಅಥವಾ ಡಯಾಬಿಟಿಕ್ ನ್ಯೂರೋಪಥಿಯಂತಹ ಇನ್ನಿತರ ಬಗೆಯ ನೋವುಗಳಲ್ಲಿ ಕೂಡ ಇದೇ ರೀತಿಯ ವಿಧಾನಗಳು ಒಳಗೊಂಡಿವೆಯೇ ಎಂಬುದು ಇನ್ನೂ ಬೆಳಕಿಗೆ ಬಂದಿಲ್ಲ ಎಂದೂ ಬಾರಿಕ್ ವಿವರಿಸುತ್ತಾರೆ. ಆದರೆ, ಇದರ ಕುರಿತಾದ ಸಂಶೋಧನೆಗಳು ನೋವಿನ ಪ್ರತಿಕ್ರಿಯೆಗಳನ್ನು ಮಿದುಳು ಹೇಗೆ ಗ್ರಹಿಸುತ್ತದೆ ಹಾಗೂ ನಿಯಂತ್ರಿಸುತ್ತದೆ ಎಂಬುದರ ಸಮಗ್ರ ಅರ್ಥೈಸಿಕೊಳ್ಳುವಿಕೆಯೆಡೆಗೆ ನಮ್ಮನ್ನು ಕೊಂಡೊಯ್ಯಬಹುದು ಎಂದೂ ಅವರು ಅಭಿಪ್ರಾಯಪಡುತ್ತಾರೆ.

“ನೋವು ಎಂಬುದು ವ್ಯಕ್ತಿಗತವಾದುದು ಹಾಗೂ ಅದು ಏಕೆ ವ್ಯಕ್ತಿಗತ ಎಂಬುದು ನಮಗೆ ಅರ್ಥವಾಗಿಲ್ಲ. ವ್ಯಕ್ತಿಗತತ್ವವೆಂಬುದು ಎಲ್ಲಿ ಉದ್ಭವಿಸುತ್ತದೆ ಎಂಬ ಬಗ್ಗೆ ನಮಗೆ ವಿವರಿಸಲು ಈ ವಿಧಾನಗಳು ಪ್ರಯತ್ನಿಸುತ್ತಿರಬಹುದು” ಎನ್ನುತ್ತಾರೆ ಬಾರಿಕ್ .

ಉಲ್ಲೇಖ:

ರೆಡ್ಡಿ ಪಿ, ನಾರಾಯಣ್ ಪಿಜೆ, ಚಟರ್ಜಿ ಎಸ್, ವರುರ್ಗೀಸ್ ಎ, ಚೌಧರಿ ವೈ, ಸತ್ಯಮೂರ್ತಿ ಎ, ಬಾರಿಕ್ ಎ, Converging inputs compete at the lateral parabrachial nuclei to dictate the affective-motivational responses to cold pain, PAIN (2024) https://journals.lww.com/pain/abstract/9900/converging_inputs_compete_at_the_lateral.771.aspx

ಸಂಪರ್ಕ:

ಅರ್ಣಬ್ ಬಾರಿಕ್
ಸಹಾಯಕ ಪ್ರಾಧ್ಯಾಪಕರು
ನರವಿಜ್ಞಾನಗಳ ಕೇಂದ್ರ (ಸಿ.ಎನ್.ಎಸ್)
ಭಾರತೀಯ ವಿಜ್ಞಾನ ಸಂಸ್ಥೆ (ಐ.ಐ.ಎಸ್.ಸಿ) ಇಮೇಲ್: arnabbarik@iisc.ac.in
ಫೋನ್: +91 80 2293 2904 ವೆಬ್ ಸೈಟ್: https://sites.google.com/view/molecules-cells-and-circuits/home

ಪರ್ತಕರ್ತರ ಗಮನಕ್ಕೆ:

ಅ) ಈ ಪತ್ರಿಕಾ ಪ್ರಕಟಣೆಯನ್ನು ಅಥವಾ ಇದರ ಯಾವುದೇ ಭಾಗವನ್ನು ಯಥಾವತ್ತಾಗಿ ಸುದ್ದಿಯಾಗಿ ಪ್ರಕಟಿಸಿದರೆ
ದಯವಿಟ್ಟು ಐ.ಐ.ಎಸ್.ಸಿ. ಹೆಸರಿನೊಂದಿಗೆ ಪ್ರಕಟಿಸಿ.
ಆ) ಐ.ಐ.ಎಸ್.ಸಿ. ಪತ್ರಿಕಾ ಪ್ರಕಟಣೆಗಳಿಗೆ ಸಂಬಂಧಿಸಿದಂತೆ ಏನಾದರೂ ಪ್ರಶ್ನೆಗಳಿದ್ದರೆ ದಯವಿಟ್ಟು news@iisc.ac.in ಅಥವಾ pro@iisc.ac.in ಗೆ ಬರೆಯಿರಿ.